ក្រុមជ្រុលនិយម ISIS បានបញ្ចេញវីដេអូថ្មីមួយទៀត ដោយគំរាមកំហែងដល់ប្រទេសទាំងឡាយណាដែលចូលរួមប្រតិបត្តិការវាយប្រហារប្រឆាំងស៊ីរី ថានឹងទទួលជោគវាសនាដូចទីក្រុងប៉ារីសដែរ ហើយពួកគេនឹងវាយប្រហារកណ្ដាលទីក្រុងវ៉ាស៊ីនតោន ឌីស៊ី នៅពេលបន្ទាប់។
ការគំរាមកំហែងជាថ្មីប្រឆាំងនឹងអាមេរិកនេះ បានធ្វើឲ្យប្រមុខភ្នាក់ងារចារកិច្ចអាមេរិក លោក Jonh Brennan ព្រមានថាការវាយប្រហារជាច្រើនទៀតនឹងធ្វើឡើងប្រឆាំងនឹងប្រទេសលោកខាងលិចដោយក្រុមភេរវករ ISIS។
ក្នុងវីដេអូមួយដែលបានបង្ហោះល្ងាចមិញ គេឃើញសកម្មប្រយុទ្ធនិយាយពីមុខកាមេរ៉ាជាភាសាអារ៉ាប់ថា៖ “យើងថ្លែងទៅកាន់ប្រទេសទាំងឡាយ ដែលចូលរួមយុទ្ធនាការឈ្លានពានស៊ីរីនោះ អ្នកនឹងមានវាសនាដូចប្រទេសបារាំង ដែលយើងបានបំផ្ទុះកណ្ដាលក្រុងប៉ារីស ហើយយើងសូមស្បថថា យើងនឹងវាយប្រហារអាមេរិកបន្ទាប់ នៅចំកណ្ដាលទីក្រុងវ៉ាស៊ីនតោនតែម្ដង”។
ISIS បានចេញមុខអះអាងទទួលខុសត្រូវចំពោះការវាយប្រហារនៅប៉ារីស ដែលបានសម្លាប់មនុស្សយ៉ាងតិច ១២៩នាក់ និងរបួសជាង ៣០០នាក់ ថាជាស្នាដៃរបស់ខ្លួន។
ចំណែកភ្នាក់ងារចារកិច្ច និងភ្នាក់ងារសន្តិសុខអាមេរិក កំពុងសិក្សាមើលថាតើក្រុមភេរវករនេះអាចវាយប្រហារបានតាមរូបភាពណាខ្លះបន្តទៀត៕
ដោយ មុន្នី proleng khmer
No comments:
Post a Comment