បុណ្យអុំទូកជិតខិតចូលមកដល់ បើទោះរាជរដ្ឋាភិបាលបានសម្រេចផ្អាកពិធីនេះក៏ដោយ តែសាលារាជធានីភ្នំពេញនៅតែរៀបចំទីតាំងកម្សាន្តសប្បាយជូនប្រជាជនទូទៅ ដូចរាល់ឆ្នាំដែរ។
អ៊ីចឹង ពេលបុណ្យអុំទូកយុវវ័យភាគច្រើនទៅលេងឯណាដែរ?
រូបតំណាង
ចំពោះ លោក ញុង ពៅ និស្សិតរៀននៅសាកលវិទ្យាល័យភូមិន្ទភ្នំពេញ ជំនាញព័ត៌មានវិទ្យា បាននិយាយថា នឹងទៅលេងស្រុកកំណើត ព្រោះពេលអុំទូកអីចឹងពិតជាសប្បាយណាស់។
អ្នកមកពីស្រុកសំរោង ខេត្តតាកែវរូបនេះ ថា ៖“ជាទូទៅគេប្រណាំងទូកនៅវត្ត ហើយមានមនុស្សច្រើនណាស់។ ចំណែកអ្នកមកប្រណាំងទូកវិញ ភាគច្រើនជាអ្នកមិនដែលធ្លាប់អុំពីមុនមក ដោយមិនហាត់សមជាមុនទេ ។ រីឯពេលយប់ គេបណ្ដែតប្រទីបនិងចាក់ធុងបាស់រាំកម្សាន្ត អ្នកខ្លះជប់លៀងជួបជុំបងប្អូននៅផ្ទះ។ គិតទៅសប្បាយណាស់”។។ យុវជនដដែលបន្តថា រាល់ឆ្នាំឲ្យតែអុំទូកមិនដែលនៅភ្នំពេញឡើយគឺមកលេងស្រុកហើយ ដោយសារលោកយល់ថានៅស្រុកសប្បាយជាង ហើយពេលមកលេងម្ដងៗគឺជិះម៉ូតូមកខ្លួនឯង ព្រោះឡានដាក់មនុស្សច្រើនពេក ពិបាកជិះណាស់ ។
ងាកមក បុគ្គលិកបម្រើការងារនៅអង្គការ CCF កញ្ញា សុភ័ក្រ ប្រាប់ថា ឆ្នាំនេះ នាងប្រហែលមិនបាននៅភ្នំពេញដែរ គឺចង់ទៅលេងសៀមរាបជាមួយគ្រួសារ ដោយសារបានឈប់សម្រាកច្រើនថ្ងៃ ដូច្នេះក៏ចង់ទៅលំហែអារម្មណ៍លេងពេលបុណ្យទានអីចឹង។
មិនខុសគ្នាប៉ុន្មាន លោក បូរ៉ា អតីតនិស្សិតសិក្សាភាសាអង់គ្លេសនៅសាកលវិទ្យាល័យន័រតុន បង្ហើបពីគោលបំណងខ្លួនថានឹងទៅលេងកោះរ៉ុង ព្រោះលោកប៉ងយូរណាស់មកហើយ។ “កម្របានឈប់សម្រាកយូរអីចឹងណាស់ គិតទៅជិតមួយអាទិត្យដែរហ្នឹង ចឹងហើយខ្ញុំទៅលេងកោះរ៉ុងជាមួយមិត្តភ័ក្ដិ ព្រោះគុំយូរហើយ។ ទេសភាពនិងបរិយាកាសទីនោះស្អាត ទាញចិត្តខ្ញុំ”។ បុរសអាយុ២៩ឆ្នាំ បញ្ជាក់។
ចំណែក បុរសរៀងស្គម សម្បុរស ឈ្មោះ វណ្ណៈ ហាក់ប្លែកពីយុវវ័យទាំងបីខាងលើ ដោយរូបគេថានឹងដើរកម្សាន្តនៅរាជធានីភ្នំពេញ។ “ខ្ញុំចង់មកទិញទំនិញ ព្រោះអុំទូកចឹងគេច្រើនលក់បញ្ចុះតម្លៃ”។
ដោយ មុន្នី proleng khmer
No comments:
Post a Comment