ការចាកចេញរបស់ សុវត្ថិឌី ធារីកា នេះបានធ្វើឱ្យមហាជនជាច្រើនខកចិត្ត និង សោកស្តាយពីទឹកដមសំឡេង និង សមត្ថភាពរបស់នាងយ៉ាងខ្លាំង សូម្បីតែគណៈកម្មការក៏មានអារម្មណ៍សោកស្តាយ និង បានសម្រក់ទឹកភ្នែកដែរ ក្នុងនោះ លោក ជា វណ្ណរិទ្ធ ដែលជាពិធីករនៅក្នុងស្ថានីយទូរទស្សន៍ក្នុងស្រុកមួយក៏បានបង្ហាញពីអារម្មណ៍មួយនេះដែរដោយលោកសរសេរថា« ធារីកា និយាយ មានអារម្មណ៍ថាស្រណោះ និង សោកស្តាយ បំផុត ព្រោះធ្លាប់បរាជ័យម្តង មិនមែនម្តងទេជាច្រើនដងមកហើយ តែសង្ឃឹមថាបរាជ័យលើកនេះជាភាពជោគជ័យរបស់ខ្ញុំ។ ពេញចិត្តនឹងសម្តីនេះហើយភាពក្លាហានរបស់ ធារីកា គឺជាគំរូដល់បេក្ខជន និង បេក្ខនារីដទៃទៀត ។ ប្អូនស្រីមកដល់វគ្គនេះគឺជាភាពជោគជ័យមួយក្នុងវិថីសិល្បៈមែន កុំអស់សង្ឃឹម ប្អូនអាចនឹងមានភាពល្បីល្បាញនៅថ្ងៃណាមួយមិនខាន ។ បងនៅជាកម្លាំងចិត្តចំពោះប្អូនស្រី សុវត្ថិឌី ធារីកា ។ ជួយផ្តល់កម្លាំងចិត្តប្អូនស្រីផង អ្នកទាំងអស់គ្នា…» ។
ឆ្លើយតបនឹងការគាំទ្រ និង ការលើកទឹកចិត្តយ៉ាងក្រាស់ក្រែលនេះ ស្រីតូចមាឌស្អិត សុវត្ថឌី ធារីកា បានសរសេរសារជាសំបុត្រផ្ទាល់ដៃសុំទោស និង ថ្លែងអំណរគុណជូនចំពោះទស្សនិកជន និង មហាជនទាំងអស់ដែលមានសេចក្តីដូចតទៅ (យើងរក្សាសំណៅដើមនៃសេចក្តីសំបុត្ររបស់នាង)៖
នាងខ្ញុំ សុវត្ថិឌី ធារីកា
សូមលើកម្រាមដៃ សុំការអភ័យទោសពីសំណាក់ លោកតា លោកយាយ លោកអ៊ុំលោកពូ អ្នកមីង បងប្អូន ជាប្រិយមិត្តដែលបានគាំទ្រ និង ផ្ញើសារដល់រូបនាងខ្ញុំតាំងពីវគ្គដំបូងរហូតមកដល់វគ្គពាក់កណ្តាលផ្តាច់ព្រ័ត្រនេះ ពីព្រោះថានាងខ្ញុំគ្មានលទ្ធភាពបានឆ្លងទៅវគ្គផ្តាច់ព្រ័ត្របានតាមការរំពឹងទុក និង ធ្វើឲ្យមានការខកចិត្តជាខ្លាំងចំពោះរូបនាងខ្ញុំ។
នាងខ្ញុំពិតជាសោកស្តាយពន់ពេកក្នុងរាត្រីដែលនាងខ្ញុំត្រូវចាកចេញពីកម្មវិធី Cambodian Idol ក្នុងសប្តាហ៍ទី៨នេះ។
នាងខ្ញុំពិតជាអាលោះអាល័យពន់ពេក ខណៈពេលដែលនាងខ្ញុំធ្វើដំណើរចេញមកមានអ៊ំស្រីជាប្រិយមិត្តគាំទ្របានឱបនាងខ្ញុំទាំងទឹកភ្នែកដ៏មានតម្លៃរបស់គាត់ ធ្វើឲ្យទឹកចិត្តដ៏រឹងមាំរបស់ខ្ញុំមិនអាចទប់បាន ក៏ប៉ុន្តែទោះបីជាយ៉ាងណា ដោយវិថីសិល្បៈមួយនៃនៅវែងឆ្ងាយតទៅទៀតសម្រាប់នាងខ្ញុំដោយមិនអស់សង្ឃឹមឡើយ វាជាក្តីស្រមៃ និង ការតាំងចិត្តតាំងពីកុមាររភាព ទោះបីដួលថ្ងៃនេះ ប៉ុន្តែនាងខ្ញុំនឹងក្រោកឈរបន្តតាមរកក្តីសុបិនមួយនេះ ដើម្បីក្លាយជាអ្នកសិល្បៈម្នាក់ដែលមានក្នុងអារម្មណ៍ និង ដួងចិត្តទស្សនិកជន និង បន្តជួយលើកស្ទួយវិស័យសិល្បៈចម្រៀងខ្មែរ ឲ្យអស់ពីលទ្ធភាពទោះជានាងខ្ញុំមិនបានទទួលពានរង្វាន់មួយនេះក៏ដោយ។
ជាមួយគ្នានេះដែរ នាងខ្ញុំសូមគោរពថ្លែងអំណរគុណដ៏ជ្រាលជ្រៅដល់គណៈគ្រប់គ្រងស្ថានីយទូរទស្សន៍ហង្សមាស បងៗគណៈកម្មការទាំង៤រូប បងពិធីករ ពិធីការិនី បងបៗក្រុមភ្លេង និង ក្រុមការងារកម្មវធី Cambodan Idol ទាំងមូលដែលបានផ្តល់ឱកាស និងបទពិសោធន៍ និងដំបូន្មានល្អៗដល់រូបនាងខ្ញុំ ។
*** តាមរយៈកម្មវិធីមួយនេះទើបធ្វើឲ្យនាងខ្ញុំត្រូវបានទស្សនិកជនស្គាល់ ក្នុងនាមជានាងតូច សុវត្ថិឌី ធារិកា
ជាចុងក្រោយនាងខ្ញុំសូមថ្លែងអំណរគុណ និងអរគុណជាពន្លឹកដល់ទស្សនិកជនទាំងអស់ ជាពិសេសលោក លោកយាយ លោកអ៊ំ ពូមីង បងប្អូន និងមិត្តភក្តិ ដែលស្រឡាញ់គាំទ្រនាងខ្ញុំតាំងពីវគ្គដំបូងរហូតដល់ពេលនេះ និង បានចំណាយពេលវេលាដ៏មានតម្លៃ និងថវិកា ដើម្បីនាងខ្ញុំ។
ដើម្បីតបស្នងនូវក្តីស្រឡាញ់ ក្តីមេត្តា និង ការគាំទ្ររបស់អ្នកទាំងអស់ ខ្ញុំមានតែម្រាមដៃដប់ បួងសួងសុំឲ្យវត្ថុស័ក្តិសិទ្ធិទាំងឡាយក្នុងលោកតាមជួយថែរក្សា និង ជួបពរ បួនប្រការ គឺ អាយុ វណ្ណៈ សុខៈ ពលៈ កុំបីឃ្លាងឃ្លាត។
ដោយក្តីគោរព និងស្រឡាញ់អ្នកទាំងអស់គ្នា
ពីនាងតូចសុវត្ថិឌី ធារិកា
ដោយ មុន្នី proleng khmer
No comments:
Post a Comment