បន្ទាប់ពីការបំផ្ទុះគ្រាប់បែក នៅប៉ុន្មានតំបន់ក្នុងទីក្រុងប៉ារីសដែលក្នុងនោះក៏មានភោជនីយដ្ឋានខ្មែរមួយដែរ បារាំងក៏បានប្រកាសដាក់ប្រទេសរបស់ខ្លួនក្នុងគ្រោះអាសន្ន។ ទោះបីជាបែបនេះក៏ដោយលោកវើក ហ្សេរ៉ាប្រជាពលរដ្ឋខ្មែររស់នៅមិនឆ្ងាយប៉ុន្មានពីភោជនីយដ្ឋាន Le Petit Cambodge បានប្រាប់ Sabay តាមទូរសព្ទមុននេះបន្តិចថា សម្រាប់លោកមិនសូវជាភ័យខ្លាចខ្លាំងចំពោះព្រឹត្តិការណ៍ដ៏ល្បីល្បាញពេញបណ្ដាញសារព័ត៌មានជុំវិញពិភពលោកនេះទេ។
មូលហេតុដែលលោកលើកឡើងយ៉ាងដូច្នេះដោយសារលោកយល់ថា យោធាបានដាក់ពង្រាយកម្លាំងជុំវិញតំបន់សំខាន់ៗ ដូចជាផ្សារទំនើប ស្ថានទូត និង កន្លែងផ្សេងទៀតដែលមានមនុស្សច្រើន ហើយម្យ៉ាងទៀតពួកជ្រុលនិយម ទំនងមិនធ្វើការវាយប្រហារលើផ្ទះប្រជាជនទេ ពោលគឺពួកគេមានគម្រោងវាយប្រហារតាមតំបន់ ឬ ទីកន្លែងដែលមានមនុស្សច្រើនតែប៉ុណ្ណោះ។
រូបតំណាង (ប្រភព៖ girlguidetoparis)
លោក ហ្សេរ៉ាបានបន្តទៀតថា កាលពីថ្ងៃម្សិលមិញ មានព្រះសង្ឃខ្មែរប្រហែល បួនឬប្រាំអង្គ បាននិមន្តទៅសូត្រមន្តនៅ ភោជនីយដ្ឋាន Le Petit Cambodge នោះដែរខណៈពេលដែលបារាំងបានកាន់ទុក្ខប្រទេសរបស់ខ្លួនរយៈពេលបីថ្ងៃ ហើយនេះជាថ្ងៃកាន់ទុក្ខទីពីរ។ ចំពោះមូលហេតុដែលគេនិមន្តព្រះសង្ឃខ្មែរទៅសូត្រធម៌នៅភោជនីយដ្ឋានខ្មែរយ៉ាងណានោះ លោកមិនបានដឹងនោះទេ។
ចំពោះផលប៉ះពាល់នឹងជីវភាពប្រចាំថ្ងៃវិញ លោកហ្សេរ៉ាបានឱ្យដឹងថា មិនមានអ្វីធ្ងន់ធ្ងរនោះទេ ព្រោះលោកនៅតែអាចទិញម្ហូបអាហារតាមហាងតូចៗក្បែរផ្ទះបាន ហើយលោកក៏បានលើកឡើងថា ប្រជាជនបារាំងមួយចំនួននៅតែ ដើរហើរដូចជាគ្មានឧប្បត្តិហេតុកើតឡើងដដែល។
(រូបពី BBC)
ចំពោះបុគ្គលិករដ្ឋវិញ ពួកគេនៅតែបន្តការធ្វើការជាធម្មតា ដោយឡែកសាលារៀនមួយចំនួនត្រូវបានបិទទ្វារបណ្ដោះអាសន្ន។ ចំណែកលោកហ្សេរ៉ាវិញមិនបានទៅធ្វើការដោយសារតែលោកមានច្បាប់លំហែមាតុភាពភរិយារយៈពេលបីសប្ដាហ៍ ប៉ុន្តែលោកបានបញ្ជាក់ថា អាទិត្យក្រោយលោកនឹងទៅធ្វើការវិញដូចធម្មតា៕
ដោយ មុន្នី proleng khmer
No comments:
Post a Comment