ខេត្តពោធិ៍សាត់៖ រថយន្តឡិចស៊ីស RX300 មួយគ្រឿងបើកលឿនដូចហោះ រួចជ្រុលរេចង្កូតបុកដើមឈើពេញទំហឹង បណ្ដាលឲ្យមនុស្សស្រីវ័យក្មេងពីរនាក់បានស្លាប់បាត់បង់ជីវិតនៅនឹងកន្លែង និងពីរនាក់ទៀតរងរបួសធ្ងន់ធ្ងរ។
ហេតុការណ៍គ្រោះថ្នាក់ចរាចរណ៍ដ៏រន្ធត់ខាងលើនេះ បានកើតឡើងកាលពីវេលាម៉ោង២៣ និង៣៥នាទីយប់ ថ្ងៃទី២៦ ខែតុលា ឆ្នាំ២០១៥ ស្ថិតនៅលើកំណាត់ផ្លូវជាតិលេខ៥ ចន្លោះបង្គោលគីឡូម៉ែត្រលេខ ២០៥ និង២០៦ ក្នុងភូមិថ្មី ឃុំត្រពាំងជង ស្រុកបាកាន ខេត្តពោធិ៍សាត់។
ប្រភពព័ត៌មានពីកន្លែងកើតហេតុ បានឲ្យដឹងថា គ្រឿងថ្នាក់ចរាចរណ៍នេះ បង្កឡើងដោយរថយន្ត១គ្រឿងម៉ាកឡិចស៊ីស RX300 ពណ៌ស្ករ ពាក់ស្លាកលេខ ភ្នំពេញ 2N-4612 បើកបរក្នុងទិសដៅពីលិចទៅកើត មានល្បឿនលឿនដូចហោះ លុះមកដល់ចំណុចកើតហេតុ ក៏បានរេចង្កូតពីផ្លូវជ្រុលទៅបុកដើមគរពេញទំហឹង បណ្ដាលឲ្យអ្នកជិះក្នុងរថយន្តស្លាប់ពីរនាក់ និងរបួសធ្ងន់ពីរនាក់ផងដែរ។
ប្រភពព័ត៌មានពីសមត្ថកិច្ច បានឲ្យដឹងថា ជនរងគ្រោះដែលស្លាប់ ទី១ មានឈ្មោះ លឹម សៅធូ ភេទស្រី អាយុ២៤ឆ្នាំ រស់នៅភូមិអន្សរក្ដាម ឃុំស្នាអន្សា ស្រុកក្រគរ ខេត្តពោធិ៍សាត់ ទី២ ឈ្មោះ ស្រី ល័ក្ខ ភេទស្រី អាយុ២៣ឆ្នាំ រស់នៅភូមិលលកសថ្មី សង្កាត់លលកស រីឯ អ្នករងរបួសធ្ងន់ទី១ មានឈ្មោះ អ៊ូច សុខុម ភេទប្រុស អាយុ៣៤ឆ្នាំ រស់នៅភូមិពោធិ៍កំបោរ ឃុំវាល ស្រុកកណ្ដៀង ខេត្តពោធិ៍សាត់ ទី២ ឈ្មោះ បង នីតា ភេទស្រី អាយុ ២៦ឆ្នាំ រស់នៅភូមិសានសុខ ឃុំកំរៀង ស្រុកកំរៀង ខេត្តបាត់ដំបង។
ក្រោយកើតហេតុ រថយន្តបង្ករងការខូចខាតយ៉ាងដំណំ រីឯអ្នកបើកបររត់គេចខ្លួនបាត់ ហើយសមត្ថកិច្ចក៏បានយករថយន្តបង្ក ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្ត ដើម្បីបន្តតាមនីតិវិធី ចំណែកឯសពជនរងគ្រោះ ត្រូវក្រុមគ្រួសារមកទទួលយកទៅធ្វើបុណ្យតាមប្រពៃណី៕
ដោយ មុន្នី ptroleng khmer
No comments:
Post a Comment