ជាថ្មីម្ដងទៀត ទួរគីបានបាញ់ទម្លាក់យន្តហោះចម្បាំងរបស់មហាអំណាចពិភពលោក រុស្សីមួយទៀតហើយកាលពីថ្ងៃទី១៦ ខែតុលា ដោយសារតែមូលហេតុដដែល នោះគឺហោះបំពានដែនអាកាសទួរគីញយដងពេកព្រមានមិនស្ដាប់ ហើយនេះប្រហែលការចាប់ផ្ដើមនៃភ្លើងសង្គ្រាមលោកលើកទី៣រវាងប្រទេសលោកខាងលិច និងរុស្សី នេះបើយោងតាមការចុះផ្សាយរបស់សារព័ត៌មានExpress របស់ចក្រភពអង់គ្លេសកាលពីថ្ងៃទី១៨ ខែតុលាម្សិលមិញនេះ ។
ហានិភ័យនៃការងើបមកវិញនៃសង្គ្រាមលោកដែលរលប់ស្ងប់បាត់ទៅតាំងពីឆ្នាំ១៩៤៥ ពេលនេះប្រហែលជាអាចដុះពន្លកមកវិញបន្តិចៗហើយ ដោយសារតែទួរគីបាញ់ទម្លាក់យន្តហោះគ្មានមនុស្សបើក (Drone) មួយទៀត បន្ទាប់ពីធ្លាប់បានបាញ់ទម្លាក់យន្តហោះចម្បាំងមួយគ្រឿងកាលពីថ្ងៃទី៩ ខែតុលាកន្លងផុតទៅប៉ុន្មានថ្ងៃនេះ ហើយចំពោះអត្តសញ្ញាណនៃប្រទេសជាម្ចាស់យន្តហោះទាំងនេះវិញនៅកំពុងត្រូវបានគេធ្វើការស៊ើបអង្កេតនៅឡើយ ខណៈដែលគេប៉ាន់ស្មានថា វាអាចជាយន្តហោះរបស់រុស្សី ។
នេះជាលើកទីមួយហើយបន្ទាប់ពីសង្គ្រាមលោកលើកទី២បិទបញ្ចប់ទៅ ដែលមានយន្តហោះយោធារបស់ក្រុមអង្គការ NATO និងយន្តហោះយោធារុស្សីហោះប្រតិបត្តិការក្នុងដែនអាកាសតែមួយដូចគ្នា ហើយបើសិនយន្តហោះទាំងនោះជាកម្មសិទ្ធិរបស់រុស្សីមែន ទួរគីអាចនឹងក្លាយជាអ្នកអូសអង្គការ NATO ទាំងមូលមកប្រឈមមុខជាមួយយោធារុស្សី ។
នាយករដ្ឋមន្ត្រីទួរគី លោក Ahmet Davutoğlu បាននិយាយថា “នេះគ្រាន់តែជាយន្តហោះ Drone ប៉ុណ្ណោះ ប៉ុន្តែបើសិនវាជាយន្តហោះចម្បាំងវិញក៏យើងផ្ដល់ចម្លើយមួយវិញយ៉ាងពេញចិត្តដែរ ឲ្យតែហោះបំពានដែនអាកាសរបស់យើង” ។ សូមបញ្ជាក់ថា យន្តហោះ Drone ដែលហោះចូលដែនអាកាសទួរគីលើកនេះបានបំពានដែនទួរគីដល់ទៅជាង៣គីឡូដី នេះជាហេតុធ្វើឲ្យទួរគីបាញ់ទម្លាក់ ។
មន្ត្រីជាន់ខ្ពស់របស់អាមេរិកម្នាក់បានចោទប្រកាន់ថា យន្តហោះ Drone នោះជារបស់រុស្សី ប៉ុន្តែត្រូវរដ្ឋមន្ត្រីការពារជាតិរបស់រុស្សីច្រានចោលយ៉ាងដាច់អហង្ការថា យន្តហោះរបស់រុស្សីទាំងអស់បានវិលត្រលប់មកដល់មូលដ្ឋានវិញយ៉ាងសុវត្ថិភាព ។
គួររម្លឹកផងដែរថា ទួរគីជាសម្ព័ន្ធមិត្តដ៏ជិតស្និទ្ធរបស់អាមេរិក ហើយប្រទេសនេះនៅមានខ្នងបង្អែកយ៉ាងក្រាស់មួយទៀត នោះគឺអង្គការ NATO តែម្ដង ដោយអង្គការនេះមានប្រទេសធំៗនៅអឺរ៉ុបជាច្រើនជាសមាជិក ។
No comments:
Post a Comment