លោក Quique Sanchez Flores អ្នកចាត់ការក្រុម Watford បាននិយាយសរសើរទម្រង់លេងរបស់ Jamie Vardy ខ្សែប្រយុទ្ធក្រុមLeicester City ថាល្អសមនឹងបានចូលលេងក្នុងជម្រើសជាតិអង់គ្លេស តំណែងខ្សែប្រយុទ្ធកណ្ដាល។
Jamie Vardy បានក្លាយជាកីឡាករសញ្ជាតិអង់គ្លេសដំបូងគេដែលអាចរកគ្រាប់បាល់បាន ៩ប្រកួតជាប់គ្នាក្នុងក្របខណ្ឌ English Premier League ហើយបច្ចុប្បន្នរូបគេក៏ឈរនៅលេខមួយផងដែរ ក្នុងបញ្ជី Top Scorer បន្ទាប់ពីមាន១២គ្រាប់ក្នុងដៃ។
ដោយមើលឃើញសមត្ថភាពល្អនេះ លោក Flores ដែលទើបតែដឹកនាំក្រុមប្រកួតចាញ់ Leicester ២-១ កាលពីថ្ងៃសៅរ៍សប្ដាហ៍មុន បានចេញមកនិយាយថាក្រុមជម្រើសជាតិអង់គ្លេសគួរតែយកកីឡាកររូបនេះលេងនៅតំបន់ប្រយុទ្ធកណ្ដាល ដោយសារតែពេលនេះខ្សែប្រយុទ្ធវ័យ២៨ឆ្នាំរូបនេះកំពុងតែឡើងជើងខ្លាំង ខ្សែការពារពិបាកបិទខ្លាំងណាស់។
ក្រុមជម្រើសជាតិអង់គ្លេសនៅពេលខាងមុខនេះនឹងមានប្រកួតមិត្តភាព២ប្រកួត ពោលគឺត្រូវប៉ះជាមួយអេស្ប៉ាញមួយប្រកួត មុនពេលប៉ះជាមួយក្រុមជម្រើសជាតិបារាំងទៀត។
ងាកទៅខាងក្រុម Leicester វិញរដូវកាលនេះ បានក្លាយជាក្លិបតែមួយគត់ដែលតាំងពីបើកឆាកដំបូងមកអាចស៊ុតបញ្ចូលទីដៃគូប្រកួតរហូត មិនថាចាញ់ឬស្មើនោះទេ៕
ដោយ មុន្នី proleng khmer
No comments:
Post a Comment