មន្ត្រីរាជរដ្ឋាភិបាលបានឲ្យដឹងកាលពីម្សិលមិញថា ថវិកាបម្រុងទុករៀបចំប្រារព្ធពិធីបុណ្យអ៊ុំទូកឆ្នាំនេះ ដែលត្រូវបានរាជរដ្ឋាភិបាលប្រកាសផ្អាកនោះ នឹងត្រូវបង្វែរទុកទិញ ប្រេងឥន្ធនៈចំនួន ៦០o,០០០ លីត្របន្ថែមទៀត ដើម្បីយកមកដំណើរការស្ថានីយ បូមទឹក និងផ្គត់ផ្គង់ទៅលើតំបន់ដែលមានភាពរាំងស្ងួត នៅដើមរដូវប្រាំងខាងមុខ។
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានបន្តប្រាប់ភ្នំពេញ ប៉ុស្តិ៍ថា ប្រេងឥន្ធនៈដែលបានទិញពីក្រុមហ៊ុន សូគីមិច នឹងត្រូវបែងចែកទៅស្ថានីយបូមទឹក ក្នុងខេត្ត ១៤ រួមមានខេត្តកណ្តាល ត្បូងឃ្មុំ កំពង់ចាម កំពង់ធំ និងកំពង់ឆ្នាំង ជាខេត្តអាទិភាព។
លោក យុត្ថា បានឲ្យដឹងថា «ជារៀងរាល់ឆ្នាំ យើងប្រើប្រាស់ប្រេងឥន្ធនៈប្រមាណជាង ១.៥ លានលីត្រ ហើយនេះជាករណីពិសេសក្នុងការបន្ថែមទិញ»។ «ការប្រមូលទឹកសម្រាប់រដូវប្រាំងលើកនេះ ដូចអ្នកដឹងស្រាប់ហើយថា ទន្លេមេគង្គ គឺមានកម្រិតទឹកទាប ណាស់ក្នុងឆ្នាំនេះ ត្រឹមតែ ៧ ម៉ែត្រទេ ចំណែកឯនៅទន្លេបាសាក់ ចតុមុខ វាមានកម្រិតទឹកជាង ៣ ម៉ែត្រ ដែលតិចជាងឆ្នាំមុន»។
អ្នកនាំពាក្យរូបនេះ បញ្ជាក់ថា លោកមិនបានដឹងពីតម្លៃប្រេងឥន្ធនៈ ឬ មានប៉ុន្មានភាគរយនៃថវិកាសរុបរបស់ ពិធីបុណ្យអ៊ុំទូកដែលត្រូវបានគេផ្តល់ឲ្យនោះទេ។
សូមបញ្ជាក់ថា លោកនាយករដ្ឋមន្ត្រី ហ៊ុន សែន បានប្រកាសផ្អាកព្រឹត្តិការណ៍ដ៏មានប្រជាប្រិយ ទាក់ទាញ មនុស្សរាប់ពាន់នាក់មកចូលរួមនៅរាជធានីភ្នំពេញ កាលពីចុងខែមុន ដោយលោកលើកឡើងថា កម្រិតទឹកនៅ ទន្លេបាសាក់ ទាបខ្លាំងណាស់ សម្រាប់ការប្រណាំងទូក។
ទោះជាយ៉ាងណា អ្នកវិភាគមួយចំនួនបានលើកឡើងថា ហេតុផលពិត គឺបញ្ឈប់អ្នកគាំទ្របក្សប្រឆាំង នាំគ្នាសម្រុកចូលមកកាន់ទីក្រុងភ្នំពេញច្រើន ក្នុងអំឡុងពេលប្រារព្ធពិធី ចំពេលដែលកំពុងមានភាពតានតឹងផ្នែកនយោបាយ ក្រោយពីមានការវាយដំលើតំណាងរាស្ត្រ គណបក្សសង្គ្រោះជាតិចំនួនពីរនាក់នៅខាងក្រៅរដ្ឋសភារួចមក៕
ដោយ មុន្នី proleng khmer
No comments:
Post a Comment