លោក សុខ វាសនា គ្រូរបស់ក្រុមយុវជន U19 ស្វាយរៀងចំនួន៨នាក់ដែលធ្វើដំណើរទៅដកស្រង់បទពិសោធន៍២សប្ដាហ៍នៅអង់គ្លេស បានរៀបរាប់អ្វីដែលលោកទទួលបានថាពិតជាច្រើន និងមានប្រយោជន៍ខ្លាំងដែលអាចយកមកអនុវត្តន៍ពង្រឹងសមត្ថភាពយុវជនខ្មែរបានមួយចំនួនធំ។
ក្រុមយុវជនស្វាយរៀងពេលប្រកួតសាកកម្លាំង
ក្រុមយុវជនស្វាយរៀង៨នាក់ ដែលទៅហាត់នៅអង់គ្លេស២សប្ដាហ៍ បានត្រលប់មកដល់កម្ពុជាវិញតាំងពីថ្ងៃទី១៦ម៉្លេះ ដោយបាននាំយកមកវិញនៅផលប្រយោជន៍ក្នុងការហ្វឹកហាត់និងបច្ចេកទេសជាច្រើន។ លោក សុខ វាសនា បានរៀបរាប់ថា៖ “ Brook house college ជាសាលាតូចមួយនៅអង់គ្លេស ប៉ុន្តែក្បួនហ្វឹកហាត់របស់គេមានស្ដង់ដា។ ក្នុងមួយសប្ដាហ៍គេហាត់តែ៥ពេលប៉ុណ្ណោះ ដោយធ្វើកម្លាំងជាមួយបាល់ឬអត់បាល់២ថ្ងៃក្នុងមួយសប្ដាហ៍ (គេអត់ហាត់នៅ Gym ដូចខ្មែរយើងទេ) ។ មានការប្រកួត១ប្រកួតរៀងរាល់សប្ដាហ៍ ដើម្បីសាកកម្លាំងគ្នា ហើយបន្ទាប់ពីហាត់ចប់ ពួកគេចូលរៀនយុទ្ធសាស្ត្របន្ថែម”។
គ្រូបង្វឹកខាងលើ បានបញ្ជាក់បន្ថែមទៀតថាខាងសាលាគេបានបង្ហាត់ក្បួនច្រើនដល់ខាងកម្ពុជា ជាពិសេសកីឡាករក្មេងៗរបស់ស្វាយរៀងតែម្ដង ដែលលោកមិនអាចរៀបរាប់អស់។ អ្វីដែលលោកទទួលបានគឺច្រើន ប៉ុន្តែប្រហែលជាមិនអាចយកមកអនុវត្តន៍នៅកម្ពុជាបានទាំងអស់នោះទេ ដោយសារតែយុវជនរបស់កម្ពុជាភាគច្រើនរៀនតាមសាលារដ្ឋ ផ្ទះនៅឆ្ងាយពីកន្លែងហាត់បាល់ មិនអាចមកហាត់ទៀងទាត់បានគ្រប់ពេលនោះទេ ។ ខុសពីសាលាស្រុកគេ មានកន្លែងហ្វឹកហាត់ស្រាប់ក្នុងសាលារៀនតែម្ដង៕
No comments:
Post a Comment