សាន់ហ្វ្រានស៊ីស្កូ៖ អ្នកនាំពាក្យក្រុមហ៊ុន Wal-Mart ដែលជាក្រុមហ៊ុនលក់ទំនិញតាមអនឡាញដ៏ធំមួយនៅសហរដ្ឋអាមេរិក បានប្រកាសកាលពីម្សិលមិញថា ក្រុមហ៊ុនគ្រោងប្រើប្រាស់យន្តហោះគ្មានមនុស្សបើក សម្រាប់ដឹកជញ្ជូនទំនិញទៅឲ្យអតិថិជនរបស់ខ្លួន។
ក្រុមហ៊ុនលក់ទំនិញដ៏ធំនេះ បានធ្វើការសាកល្បងបច្ចេកវិទ្យានៅខាងក្នុងក្រុមហ៊ុនអស់រយៈពេលជាច្រើនខែ ហើយកាលពីថ្ងៃច័ន្ទនេះ ក្រុមហ៊ុនបានដាក់ពាក្យស្នើសុំការអនុញ្ញាតប្រើប្រាស់វាជាផ្លូវការពីរអាជ្ញាធរគ្រប់គ្រង់ការហោះហើររបស់សហរដ្ឋអាមេរិចរួចទៅហើយ។
ក្រៅពីការប្រើប្រាស់ក្នុងការដឹកជញ្ជូនអ៊ីវ៉ាន ក្រុមហ៊ុន Wal Mart ក៏ចង់ប្រើប្រាស់កូនយន្តហោះដែលគ្មានមនុស្សបើកនេះសម្រាប់ត្រួតពិនិត្យឃ្លាំងទំនិញ ឬបរិក្ខារផ្សេងៗដែលជាកម្មសិទ្ធរបស់ក្រុមហ៊ុន ឬសម្រាប់ដឹកជញ្ជូនអ៊ីវ៉ានដែលអតិថិជនបានទិញពីក្នុងហាង ទៅរថយន្តរបស់ពួកគេផងដែរ។
កាលពីខែ មីនា រដ្ឋបាលអាកាសចរណ៍សហព័ន្ធអាមេរិក បានប្រកាសថា ខ្លួននឹងអនុញ្ញាតឲ្យក្រុមហ៊ុន Amazon ដែលជាក្រុមហ៊ុនលក់ទំនិញតាមអ៊ីនធើណេតដ៏ធំមួយទៀតរបស់អាមេរិច ធ្វើការសាកល្បងទៅលើកម្មវិធីបច្ចេកវិទ្យា Drone របស់វា។
ក្រុមហ៊ុននេះសង្ឃឹមថា ខ្លួននឹងអាចអភិវឌ្ឍប្រព័ន្ធដឹកជញ្ជូនដែលអាចយកកញ្ចប់ទំនិញតូចៗទៅដល់គោលដៅដោយប្រើប្រាស់រយៈពេលត្រឹមតែ ៣០នាទីប៉ុណ្ណោះ។
ចំណែកឯក្រុមហ៊ុន Google ឯណោះវិញ ក៏មានបំណងចង់ប្រើប្រាស់បច្ចេកវិទ្យានេះដែរ ហើយកាលពីខែសីហាឆ្នាំមុន ពោលគឺមួយខែមុនពេលដែល Amazon ដាក់ពាក្យស្នើសុំការធ្វើការសាកល្បងហោះហើរកូនយន្តហោះ Drone ក្រុមហ៊ុននេះ ក៏បានប្រកាសផងដែរថា ខ្លួនកំពុងតែធ្វើការពិសោធន៍សាកល្បងកូនយន្តហោះ Drone របស់ខ្លួន ដើម្បីប្រើប្រាស់វាក្នុងការដឹកជញ្ជូនទំនិញដែលត្រូវបានទិញតាមអ៊ីនធើណេត៕
ដោយ មុន្នី proleng khmer
No comments:
Post a Comment