សេដ្ឋកិច្ចជប៉ុន បានធ្លាក់ចុះជាថ្មីនៅត្រីមាសទីបី ឆ្នាំ២០១៥។ នេះបើតាមការិយាល័យគណៈរដ្ឋមន្ត្រីជប៉ុនបានប្រកាសឲ្យដឹងកាលពីថ្ងៃចន្ទ ទី១៦ វិច្ឆិកាម្សិលមិញ។
សេដ្ឋកិច្ចជប៉ុនកាន់តែយ៉ាប់យ៉ឺនទៅៗជាងការរំពឹងទុកទៅទៀតក្នុងត្រីមាសទី ៣នេះ ដែលនាំឲ្យមានការធ្លាក់ចុះពីរត្រីមាសជាប់ៗគ្នា និងធ្វើឲ្យប្រទេសមានសេដ្ឋកិច្ចធំលំដាប់ទីបីរបស់ពិភពលោកនេះកំពុងរងភាពរង្គោះរង្គើ។ ភាគហ៊ុននៅរាជធានីតូក្យូ បានធ្លាក់ប្រមាណ ១% កាលពីព្រឹកថ្ងៃចន្ទម្សិលមិញ។
នាយករដ្ឋមន្រ្ដីជប៉ុន សិនហ្សូ អាបេ
ក្នុងរយៈពេលបីខែ គិតត្រឹមខែ កក្កដា ដល់ខែកញ្ញា សេដ្ឋកិច្ចជប៉ុនបានធ្លាក់ចុះដល់ ០,៨% ច្រើនជាងការរំពឹងទុក ០,២% ដែលធ្វើឲ្យវាដាំក្បាលចុះលើកទី៥ ក្នុងរយៈពេល ៧ឆ្នាំចុងក្រោយ។
ការធ្លាក់ចុះនេះបានរងឥទ្ធិពលពីប្រទេសចិន ដោយសារចិនកាត់បន្ថយតម្រូវការសម្ភារៈឧស្សាហកម្ម ម៉ាស៊ីនសម្រាប់ការសាងសង់ និងទំនិញជាច្រើនមុខទៀត ដែលផ្គត់ផ្គងដោយជប៉ុន។ មួយវិញទៀត ជប៉ុន កំពុងខ្វះកម្លាំងពលកម្ម។
បើយោងទៅតាមប្រព័ន្ធផ្សព្វផ្សាយជប៉ុន រដ្ឋាភិបាលក៏បានកំពុងធ្វើការលើកម្មវិធីលើកស្ទួយសេដ្ឋកិច្ចដែរ ជាមួយទឹកប្រាក់ប្រមាណ ២៩ពាន់លានដុល្លារ ប៉ុន្តែទិដ្ឋភាពសេដ្ឋកិច្ចជប៉ុននៅតែទន់ខ្សោយ។ អ្នកវិភាគជាច្រើនព្យាករថាកំណើននឹងមានត្រឹមមធ្យមប៉ុណ្ណោះសម្រាប់ត្រីមាសនេះ ដោយសារក្រុមហ៊ុននៅជប៉ុនជាច្រើន នៅស្ទាក់ស្ទើរវិនិយោគ ដោយខ្លាចក្រែងប្រាក់ឈ្នួលបុគ្គលិកកើនឡើង ដែលត្រូវប្រជែងនឹងផែនការសេដ្ឋកិច្ចនាយករដ្ឋមន្ត្រីអាបេ។
លោកអាបេ ដែលកាន់តំណែងរយៈពេល ៣ឆ្នាំ បានបង្កើតឲ្យមានផែនការសេដ្ឋកិច្ច «Abenomics» ដោយមានជំនួយពីធនាគារជាតិ និងធនាគារជប៉ុន (Bank of Japan) បានជួយឲ្យទីផ្សារភាគហ៊ុន និងតម្លៃប្រាក់យេនកើនឡើង ដោយក្រុមហ៊ុនចម្រុះជាតិសាសន៍ជាច្រើនដូចជា Toyota អាចរកប្រាក់ចំណូលបានច្រើនពីក្រៅប្រទេសផងដែរ៕
ដោយ មុន្នី proleng khmer
No comments:
Post a Comment