ក្រសួងការបរទេស និងសហប្រតិបត្តិការអន្តរជាតិ អះអាងថា មិនមានពលរដ្ឋខ្មែរណាម្នាក់បានស្លាប់នៅក្នុងព្រឹត្តិការណ៍វាយប្រហារពីក្រុមភេរវកម្មទៅលើភោជនីយដ្ឋានខ្មែរមួយកន្លែងឈ្មោះ ឡឺ ប៉ើទី កាំបូឌ (Le Petit Cambodge) នៅក្នុងទីក្រុងប៉ារីស ប្រទេសបារាំង កាលពីថ្ងៃទី១៣ វិច្ឆិកា នោះទេ។
អ្នកនាំពាក្យក្រសួងការបរទេស លោក ជុំ សុន្ទរី ឲ្យដឹងនៅថ្ងៃទី១៥ វិច្ឆិកា ថា មន្ត្រីស្ថានទូតកម្ពុជា ប្រចាំប្រទេសបារាំង បានចុះទៅដល់ភោជនីយដ្ឋានដែលរងការវាយប្រហារនោះរួចហើយ។ លោកថា ក្រោយពេលសាកសួរម្ចាស់ហាងជាជនជាតិខ្មែរនៅទីនោះ គឺមិនមានជនជាតិខ្មែរណាម្នាក់បានរងរបួស ឬស្លាប់នៅក្នុងហេតុការណ៍នោះឡើយ។
យ៉ាងណា លោក ជុំ សុន្ទរី ថា សម្រាប់ការវាយប្រហារនៅកន្លែងផ្សេងៗទៀត ស្ថានទូតកម្ពុជា ប្រចាំប្រទេសបារាំង កំពុងទាក់ទងជាមួយសមត្ថកិច្ចបារាំង បន្តទៀត៖ «ពីយប់មិញស្ថានទូតយើងបានរាយការណ៍មកថា ស្ថានទូតបានចុះទៅផ្ទាល់ដល់ភោជនីយដ្ឋាន ឡឺ ប៉ើទី កាំបូឌ ហើយបានបញ្ជាក់មកថា អត់មានពលរដ្ឋខ្មែរស្ថិតក្នុងចំណោមអ្នកស្លាប់ និងអ្នករបួសក្នុងការបាញ់ប្រហារនៅភោជនីយដ្ឋានឡើយ»។
ក្រុមភេរវកររដ្ឋអ៊ីស្លាម អាយ ស៊ីស (ISIS) កាលពីថ្ងៃទី១៣ វិច្ឆិកា បានបើកការវាយប្រហារលើទីតាំងចំនួន ៦កន្លែងចំកណ្ដាលទីក្រុងប៉ារីស ប្រទេសបារាំង ដែលរហូតមកទល់ពេលនេះ បានបណ្ដាលឲ្យមនុស្សចំនួន ១២៩នាក់បាត់បង់ជីវិត។ ការវាយប្រហារនេះ បានកើតឡើងរយៈពេល ១០ខែ ក្រោយការវាយប្រហារទៅលើការិយាល័យទស្សនាវដ្ដីបារាំង ឈ្មោះ ឆាលី ហេបដូ (Charlie Hebdo) ដែលកាលណោះបានបណ្ដាលមនុស្សចំនួន ១២នាក់ស្លាប់។
រដ្ឋាភិបាលកម្ពុជា និងបក្សប្រឆាំង ក៏បានចេញសេចក្តីថ្លែងការណ៍ថ្កោលទោសចំពោះការវាយប្រហារភេរវកម្មនៅពេលនេះ និងចូលរួមរំលែកទុក្ខដល់ក្រុមគ្រួសារជនរងគ្រោះដោយការវាយប្រហារនេះ៕
ដោយ មុន្នី proleng khmer
No comments:
Post a Comment