មានក្រុមអ្នកសម្អាងការ និង តុបតែងសម្ផស្សជាច្រើន បានរៀបចំនូវម៉ូតសក់ ព្រមទាំងបានស្លៀកពាក់សំលៀកបំពាក់ប្រពៃណីជប៉ុនដល់យុវជន ហើយនិងថតរូបពួកគេទុក ដើម្បីប្រារព្ធពិធីមួយ ដែលប្រជាជនជប៉ុននិយមធ្វើឡើង សម្រាប់អបអរការឈានមកដល់ភាពវ័យរបស់ក្រុមយុវជន ។
នៅពេលដែលក្រុមយុវជនមានវ័យគ្រប់បាន២០ឆ្នាំនោះ ពួកគេត្រូវបានចាត់ទុកថាជាមនុស្សពេញវ័យ ពីសំណាកប្រជាពលរដ្ឋនៃប្រទេសជប៉ុន ។ ប្រជាពលរដ្ឋជប៉ុនបានប្រារព្ធពិធីបុណ្យ ភាពជាមនុស្សពេញវ័យ ចំពោះរាល់មនុស្សប្រុសស្រីណា ដែលមានវ័យគ្រប់២០ឆ្នាំ ដោយឲ្យពួកគេបានហៅឈ្មោះពិធីបុណ្យនោះថា “សេជីនណូហ៊ិ” ដែលមានន័យថា “ការមកដល់នូវថ្ងៃគ្រប់អាយុ” ។
ជាធម្មតាពិធីបុណ្យនេះត្រូវបានគេ រៀបចំឡើងនៅរៀងរាល់ថ្ងៃទី១៥ ខែមករា ប៉ុន្តែត្រូវបានសម្រេចប្ដូរមករៀបចំនៅរៀងរាល់ថ្ងៃច័ន្ទ សប្ដាហ៍ទី២ នៃខែមករា ជំនួសវិញ ចាប់តាំងពីឆ្នាំ២០០០មកម្ល៉េះ ។
រាល់បណ្ដារាជធានី និង ទីក្រុងនីមួយៗ តែងតែប្រារព្ធពិធី ហើយរាល់បណ្ដាយុវជនទាំងអស់ ត្រូវត្រឡប់ទៅស្រុកកំណើតរបស់ខ្លួន ដើម្បីចូលរួមកម្មពិធីដ៏វិសេសវិសាលនេះ ព្រោះវាជាឱកាសសម្រាប់ពួកគេជួបជុំជាមួយមិត្តភ័ក្ដិចាស់ៗ ព្រមទាំងក្រុមគ្រួសារផងដែរ។
លើសពីនេះទៅទៀត អ្វីដែលជាភាពទាក់ទាញ សម្រាប់ពិធីបុណ្យនោះ គឺគ្រប់យុវជនដែលពេញវ័យ ត្រូវបានតុបតែងខ្លួនជាប្រពៃណីបុរាណ ដោយនារីៗស្លៀកសំលៀកបំពាក់គីម៉ុណុ ដែលមានសំពត់វែង និងអាវដៃវែង ហ្វឹរីសុដិ ចងបូផ្កា រួមជាមួយការធ្វើសក់លក្ខណសាមញ្ញបែបជប៉ុន ដោយលម្អដោយបុប្ផាចម្រុះពណ៌ផងដែរ។ ចំណែកឯបុរសវិញក៏ស្លៀកសំលៀកបំពាក់បែបនោះដែរ ដោយឡែកពូកគេស្លៀកសំពត់វែង មានឈ្មោះថា ហាកាម៉ា ដែលញ៉ាំងពិធីនោះមានភាពទាក់ទាញភ្ញៀវទេសចរណ៍ជាតិ និងអន្តរជាតិក្នុងការថតរូបទាំងនោះទុកជាអនុស្សាវរីយ៍៕
No comments:
Post a Comment